40 Dae 2022 – Dag 10

Posted on

Een van die groot beelde wat Matteus gebruik om te praat oor Jesus kan maklik by ‘n mens verbygaan.  Maar as jy dit eers raakgesien het, dan kan mens dit nie meer miskyk nie.  Dit gaan oor Moses en hoedat Jesus eintlik ‘n nuwe beter Moses was.

Vir ons klink dit vreemd, want dit is tog voor die hand liggend dat Jesus groter is as Moses.  Maar dit was belangrik vir Matteus se Joodse lesers om dit te hoor en verstaan a.g.v. die hoë waarde wat hulle aan die figuur van Moses geheg het.  Hy is immers die profeet/instrument waardeur God hulle uit Egipte, uit slawerny bevry het, waardeur Hy die Wet aan hulle gebring het en waardeur Hy hulle in die woestyn begelei het.

Ons weet dat Moses uit Egipte gekom het, deur die waters van die Rooisee gegaan het, vir 40 jaar in die wildernis rondgeswerf het en die Wet van God op die berg ontvang het.  Nou lees ons dat Jesus

  • ook uit Egipte (terug) gekom het, nadat Josef Hom daar gaan wegsteek het sodat Herodes Hom nie kon kry nie (Matt 2:13-14).
  • deur water gegaan het – gedoop is in die Jordaan in Matteus 3:13-17. (Die NT skrywers het die volk se trek deur die see ook as ‘n soort doop gesien. Vgl. 1 Kor 10:1-2)
  • in die wildernis was, maar vir 40 dae (Matt 4:1-11).
  • die Wet op die berg uitgelê het (Die Bergrede – Matt 5-7).

Jesus kom doen dan dieselfde as Moses, net soveel groter en beter! Hy kom maak die volk vry van die slawerny van sonde (1:21), onderrig die mense in die Wet en Woord van God (Vgl. 7:28-29) en kom lei God se nuwe verbond in (26:26-30).  Soos wat Moses die tabernakel in die woestyn gebou het sodat daar offers aan God gebring kon word, so kom Jesus by ons tabernakel, onder ons woon (sien Joh 1:14) – Hy word God met ons (Matt 1:23).  En bring Hy een, finale, ewige offer om ons totaal en al skoon te was van ons sonde.

Hierdie gedagte van Jesus > Moses sien ons ook in Hebreërs: “Moses was as dienaar getrou in die hele huis van God en moes getuig van die dinge wat God nog sou sê. Christus daarenteen is as Seun getrou oor die huis van God. En ons is sy huis as ons maar net met moed en oortuiging bly vashou aan wat ons hoop.” (Heb 3:5-6)

En in Hebreërs 9:14-15  lees ons van die voortrefliker offer:

“Hoeveel te meer sal die bloed van Christus ons gewete bevry van die las van dade wat tot die dood lei, sodat ons die lewende God kan dien! Hiervoor het Christus immers Homself as volkome offer deur die ewige Gees aan God geoffer. Daarom is Hy ook die Middelaar van ‘n nuwe verbond. Sy dood het plaasgevind om mense te verlos van die oortredinge wat onder die eerste verbond begaan is, sodat dié wat geroep is, die beloofde ewige erfenis kan ontvang.”
Hoe groot en getrou is ons God deur al die eeue!

40 Dae 2022 – Dag 9

Posted on

In Matteus 5-7 kry ons die beroemde Bergrede.  Hierin begin die Here Jesus om uit te lê hoe die Koninkryk van die Hemel dan werk.  Net in die vorige hoofstuk lees ons hoe dat siekes, besetenes, versteurdes en verlamdes na Hom toe gestroom het en ‘n groot menigte mense hom gevolg het (4:24-25).  Dit is m.a.w. hierdie menigte met wie Hy praat in hoofstuk 5:1.

Verrassend begin sy leerrede nie met ‘n klomp reëls of wette nie, maar met seëninge.  Spesifiek wat ons vandag ken as die Saligsprekinge.  ‘n Lys van nege seëninge wat Hy oor die mense voor Hom uitspreek en daardeur ook vir hulle in nooi by die evangelie van die Koninkryk.

Soos met enige iets in die Bybel is die volgorde hier belangrik en nie sommer toevallig nie. (So staan “liefde” byvoorbeeld baie aspris eerste in Paulus se lys van die vrugte van die Gees.)  Daarom moet ons ook die belang van die eerste van die Saligsprekinge besef omdat dit ook as’t ware as ‘n opskrif dien om ons te help om die res van die lysie (en die res van die Bergrede) te verstaan.

Matteus 5:3 sê: “Geseënd is dié wat weet hoe afhanklik hulle van God is, want aan hulle behoort die koninkryk van die hemel.” En in die Ou Vertaling: “Salig is die wat arm van gees is, want aan hulle behoort die koninkryk van die hemele.”

Die ’83 Vertaling se “weet hoe afhanklik hulle van God is” help ons om om die “wat arm van gees is” te verstaan, en andersom.  Dit is een van die grootste beginsels in God se onderstebo Koninkryk (onderstebo vanuit die wêreld se perspektief!) om te weet dat ons van God alleen afhanklik is.  Hulle wat geestelik trots en selfversekerd is en dink dat hulle alles onder beheer het, gaan moeilik dink dat hulle bekering nodig het en moeilik die Koninkryk verstaan.

Maar die gebrokenes en moedeloses (Ps 34:19), die wat hul eie gebrokenheid en afhanklikheid kan erken, kan met leë hande voor God kom staan om sy genade te ontvang.  Hulle weet dat hulle arm is aan hulle eie goedheid en aansien en eer en prestasie – want aan hulle behoort die Koninkryk van God.  As ons dit verstaan kan ons die ander Saligsprekinge op hierdie lys beter begryp en beter begryp wat dit beteken om God se Koninkryk te soek!

Wat ‘n ongelooflike troos dat ons ook – met ons gebrokenheid, ons geestelike onbeholpenheid, met niks om God te bied om Hom mee te probeer beïndruk nie – na Hom toe kan gaan en sy genade kan ontvang!

40 Dae 2022 – Dag 8

Posted on

In Hoofstuk 4 sluit Matteus die eerste groot gedeelte van sy evangelie netjies af.  Ons sien hoedat Jesus se bediening ná sy versoeking in die woestyn in Kapernaum begin.  Dan roep Hy sy eerste dissipels en dan in vers 23-25 kry ons ‘n kort opsomming van al die dinge wat Jesus in daardie tyd gedoen het.  In vers 23 sê hy:

Hy het toe in die hele Galilea rondgegaan en die mense in hulle sinagoges geleer, die evangelie van die koninkryk verkondig en elke soort siekte en kwaal onder die volk gesond gemaak.

Hier is baie belangrike inligting om in te neem voordat Jesus in Hoofstuk 5-7 met die Bergrede begin.

In die feit dat Jesus sy bediening daar by die see van Galilea begin word nog ‘n profesie oor Hom vervul.  Weer kom bevestig Matteus vir sy lesers dat hierdie Jesus niemand anders as die Messias, die Christus, die Gesalfde van God is nie.  Hy haal weer die profeet Jesaja aan en daarin besef ons net weer hoe groot en getrou ons God is.  Hoe fyn sy Heilsplan tot op die laaste detail iets oor Hom openbaar.

In vers 17 lees ons dan vir die eerste keer dat Jesus self die frase “die Koninkryk van die Hemel” gebruik: Van toe af het Jesus begin preek en gesê: “Bekeer julle, want die koninkryk van die hemel het naby gekom.”

Dit dien as ‘n soort opskrif vir dit wat hier na volg.  Want Jesus sê dit nie net nie – Hy kom openbaar die Koninkryk van die Hemel in woord en in daad.  In sy prediking en in sy wonderwerke.  Maar ook in sy liefde en uitreik en omgee vir mense.  In sy verhouding met die Vader, en in sy verhouding met sy dissipels.  In die gelykenisse wat Hy vertel en in sy strydgesprekke met die Fariseërs.  En natuurlik in sy offer aan die kruis en sy opstanding uit die dood.

Asof Matteus se inleiding tot hier dit nog nie duidelik genoeg gestel het nie, begin hy die Koninkryk nou soveel duidelik uitspel.

Wanneer Jesus sy dissipels roep sien ons ook wat belangrik is in sy Koninkryk (watter kant bo is).  Soos nog altyd was eer en aansien en posisie vir die mens belangrik – ook so (en dalk nog meer) in die Joodse samelewing van daardie tyd.  Die dissipels wat ons hier ontmoet het op hulle jong ouderdom alreeds ‘n paar stappies terug geval op die destydse godsdienstige eer/aansien leertjie.  Hulle volg nie ‘n ander rabbi/leermeester nie, maar is vissermanne van beroep. Gewone mense.

Net soos wat mens sou verwag dat die Koning van die konings in ‘n paleis sou bly, goue klere en juwele dra, en op ‘n wit perd ry (soos wat aardse konings dit doen!) sou mens seker vergewe kon word om te verwag dat God se Messias eerder slimste en mees gesiene teoloë en invloedrykste mense in sy binnekring sou hê.

Die teendeel is egter waar. Jesus roep gewone mense as sy dissipels en om dat HY is wie Hy is WORD hulle van die invloedrykste mense in die geskiedenis.  Sy Koninkryk is anders!  Prys die Here dat ek en jy ook daarvan kan deel wees.  Dat Hy ons ook roep om Hom te volg en sy Koninkryk te verkondig.

40 Dae 2022 – Dag 7

Posted on

Ons reis verder deur Matteus in ons soeke na die Koninkryk van die Hemel sodat ons met die regte perspektief die wêreld regtekant bo kan draai.

Wanneer die Here Jesus in die woestyn versoek word, openbaar Hy nie net dat Hy die mag het oor die duiwel en al sy versoekings nie, maar ook iets oor sy Koninkryk en oor watter tipe koning Hy is.  Deur sy reaksie op die duiwel se versoekings wys Hy wat dit beteken om van God alleen afhanklik te wees, op Hom te vertrou en Hom alleen te dien.

Ons word ook met hierdie versoekings gekonfronteer.  Dalk bietjie meer subtiel, maar ook waarskynlik daarom juis meer gereeld.  Dat die koninkryk van die wêreld met al sy aanloklikhede vir ons so aantreklik gemaak word en dat die versoeking al hoe groter voel hoe meer desperaat ‘n mens is.  Teenoor die wêred se koninkryk staan die Koninkryk van die Hemel en Jesus kom wys vir ons dat wanneer ons besef dat ons burgers van sy Koninkryk is ons ook hierdie versoekings kan weerstaan.

Ons kan dit regkry wanneer ons God se Koninkryk soek.  Dit beteken dat ons weet dat ons van Hom alleen afhanklik is (5:3) dat ons Hom alleen dien (5:24) en op Hom alleen vertrou vir alles wat ons nodig het (6:31-32).  In die Koninkryk van die Hemel is ons prioriteite anders want dit gaan nie meer oor ons en ons eie rykdom, eer en gemak nie.  Dit gaan oor God en sy plan en sy eer in die wete dat Hy sorg vir alles (6:33).

Ons lees in Matteus 4:8-11

Toe neem die duiwel Hom na ‘n baie hoë berg toe, wys Hom al die koninkryke van die wêreld met hulle prag en sê vir Hom: “Dit alles sal ek vir U gee as U neerval en my aanbid.” Maar Jesus sê vir hom: “Gaan weg, Satan, want daar staan geskrywe:  “Die Here jou God moet jy aanbid en Hom alleen dien.”

Dis eintlik so ironies – alles behoort reeds aan Jesus.  En elke knie sal voor Hom buig.  Juis omdat Hy nie ‘n aardse, magsugtige, wrede koning is nie.  Maar omdat Hy, die Koning van konings, bereid was om alles vir ons op te offer.  Die Koning wys dat sy prioriteite anders is as die van aardse konings.  Sy Koninkryk is anders.  In sy Koninkryk is God se liefde meer werd as “al die koninkryke van die wêreld met hulle prag”. En Hy nooi ons om deel daarvan te wees en dit te soek.

40 Dae 2022 – Dag 6

Posted on

In Matteus 3 verskyn Johannes die Doper op die toneel en kry ons ook by hom ‘n groot Koninkryksles.  Hy is in elke opsig die voorganger, die wegbereider van Jesus.

Eerstens verkondig Johannes dieselfde boodskap as die een wat Jesus gaan verkondig. Dit is hier in 3:1-2 wat ons dan die eerste keer die frase “die Koninkryk van die Hemel” in die evangelie aantref en dit is Johannes wat dit sê:

In daardie tyd het Johannes die Doper in die woestyn van Judea begin preek en gesê: “Bekeer julle, want die koninkryk van die hemel het naby gekom.”

Hy begin die mense voorberei dat die Messias oppad is, en dat die Koninkryk op hande is en dat dit ook Jesus se boodskap sal wees (4:17).  In ‘n sekere sin is dit presies waarmee ons in hierdie 40 Dae wil besig wees – om onsself te bekeer want die Koninkryk het naby gekom.  Om ons wêreld weer reg te draai, weg van ons eie planne en ons eie pad en eerder volgens God se plan leef en sy pad te loop. Om Jesus se Koningskap oor ons en ons wêreld te erken en dit sigbaar uit te leef.

Tweedens is Johannes besig om Jesus se identiteit as ware Koning en Messias te bevestig omdat dit hy is wat dit moes kom doen soos die Here dit deur sy profete voorspel het. (Een van die bewyse wat Matteus gee dat Jesus “Die Regte Koning” is wat bo staan!  Luister gerus na gister se preek vir meer.)

In vers 3:3 haal Matteus uit Jesaja 40 aan: Hy is die een wat die profeet Jesaja bedoel het toe hy gesê het: “Iemand roep in die woestyn: Maak die pad vir die Here gereed, maak die paaie vir Hom reguit.”

Ons lees ook dat die mense na Johannes gestroom het om na hom te luister en om deur hom gedoop te word (3:5-6).  Johannes het iets nuuts gesê en die mense wou graag daarvan hoor.  Dit was net te moeilik om sy boodskap te ignoreer.  So berei God alreeds die grond voor vir Jesus se koms.  So teen die tyd wat Jesus begin optree is die verwagting al geskep en moes die atmosfeer elektries gewees het!

Tot die Fariseërs en die Sadduseërs het gekom om na Johannes te luister. Dit is ook opvallend dat Johannes nie by die tempel in Jerusalem sy bediening begin nie, maar in die woestyn weg van die tempel en al die godsdienstige vroomheid. Weereens ‘n bewys dat die Koninkryk van die Hemel anders is as die heersende magte van die wêreld en nie net beperk is tot die Jode en die godsdienstige leiers nie, maar oral gekom het vir almal.

Derdens wys Johannes weg van homself af om die aandag op Koning Jesus te vestig. Vers 11 sê:

Ek doop julle wel met water omdat julle julle bekeer het, maar Hy wat ná my kom, is my meerdere, en ek is nie eers werd om sy skoene uit te trek nie. Hy sal julle met die Heilige Gees en met vuur doop.

Iets wat ons ook met ons hele lewens behoort te doen!  Om, soos Johannes, die vinger weg te wys van onsself en ons eie eer, en die aandag altyd op Jesus en en sy eer en sy Koninkryk vestig.  Ons kan gerus kyk na Johannes se lewe as voorbeeld van hoe dit lyk om die wêreld regtekant bo te draai.

40 Dae 2022 – Dag 4

Posted on

Ons is nog nie klaar met die “Byse Manne” nie! (As jy wonder hoekom ons “wyse manne” met ‘n B spel, gaan lees eers gister se dagstukkie.) Daar is nog Koninkrykslesse om by hulle te leer.  Dit gaan oor wat gebeur wanneer hulle by Jesus aankom. Ons lees in Matteus 2:11 daarvan:

“Hulle het in die huis ingegaan en die Kindjie saam met Maria, sy moeder, gesien, en hulle het gekniel en aan Hom hulde bewys. Daarna het hulle hulle reissakke oopgemaak en vir Hom geskenke uitgehaal: goud, wierook en mirre.”

Die woord wat ons hier vertaal met “reissakke” sou ons beter kon vertaal met “skatkiste”.  Hulle het hulle skatkiste saamgebring en dit wat vir hulle waardevol was gegee om aan Jesus hulde te bring.  Maar waarom nou juis goud, wierook en mirre?

Goud was in daardie tyd nie so skaars of waardevol soos ons vandag daaraan dink nie, maar dit is wat konings in oorvloed gehad het. 1 Konings 9:27-28 vertel vir ons: “Hiram het vir hom skepe gestuur en ervare seemanne. Hulle het saam met Salomo se manne na Ofir toe gevaar en daar vir koning Salomo meer as veertien ton goud gaan haal.”

Dit was ‘n koninklike geskenk en met hierdie stukkie detail kom bevestig Matteus weer vir ons dat Jesus die Koning is.  ‘n Voorskou van die feit dat Hy nie net die Koning van die Jode is nie, maar die Koning oor alles en almal.

Wierook is gebrand in die tempel as offer.  Eksodus 30:8 sê: “Elke aand wanneer hy die lampe aansteek, moet hy wierook brand. Die wierookoffer moet altyd, ook deur julle nageslag, vir My, die Here, gebring word.”  Deur hierdie geskenk word die offer wat Jesus sou bring ook reeds hier uitgespel. Dat Hy self die geur in die tempel sou wees van ‘n offer wat aan God gebring is vir die versoening van sonde, dat Hy self die offer was.

Mirre is gebruik as verdowingsmiddel vir mense wat gekruisig word, soos Markus 15:23 vir ons wys: “Hulle wou vir Hom wyn gee met mirre daarin, maar Hy wou dit nie hê nie.”  Dit is ook gebruik om ‘n liggaam te behandel voor ‘n begrafnis.  Johannes 19:39 & 40 sê:

“Nikodemus, wat ‘n keer in die nag na Jesus toe gekom het, het ook gekom en ‘n mengsel van omtrent vyftig liter mirre en aalwyn gebring. Hulle het die liggaam van Jesus geneem en dit met die geurolie behandel en in doeke toegedraai, soos dit die gebruik van die Jode was om iemand vir die begrafnis uit te lê.”

Hier kry ons ook ‘n voorskou van wat met die Koning sou gebeur. Hy het gesterf aan die kruis, sy liggaam is behandel, maar Hy het opgestaan. Dat Hy moes ly en sterf en begrawe moes word, maar dat die dood Hom nie gevange sou kon hou nie.

In ons soeke na die antwoord op die vraag oor watter kant bo is in hierdie deurmekaar wêreld begin Matteus ons vroeg in sy evangelie al help om te sien dat daar Een is wat bo staan – Koning Jesus.  As ons dit besef dan kan ons begin om uit te werk wat dit beteken om weer ons wêreld, ons lewens regtekant bo te draai.

40 Dae 2022 – Dag 3

Posted on

Een van my seuns (wat ter wille van sy tiener-selfbeeld nou naamloos sal bly) het eendag by die huis gekom na daar die oggend by die kleuterskool geoefen is vir die Kersspel. So gee hy die dag sy oupa ‘n drukkie en my pa sê vir hom: “Oupa se engeltjie!” En my seuntjie antwoord dadelik terug: “Oupa ek is nie ‘n engeltjie nie, ek is ‘n Byse Man!” (Gespel met ‘n B, want hy kon nie ‘n W sê nie.)

Nou die storie van die “wyse manne” wat Jesus kort na sy geboorte kom besoek is natuurlik een van die groot hoogtepunte van die Kersverhaal. Ongelukkig word dit meestal slegs in Kerstyd gelees, terwyl hierdie gedeelte van Matteus so ryk is aan Koninkrykstaal en ons al duideliker kan sien hoe die Koninkryk van die Hemel, reeds met Jesus se geboorte, begin deurbreek.

Die verhaal van die Sterrekykers wat uit die ooste kom om die Koning van die Jode te kom opsoek is opgeteken in Matteus 2.  Lees gerus weer die hele hoofstuk deur.  Dit is gelaai met aanhalings uit die Ou Testament, profesieë wat in Jesus vervul word (sien Matt 2:5-6, 15, 17-18, 23). Daarmee word weereens beklemtoon dat daar geen twyfel moet wees oor die identiteit van Jesus nie. Hy IS die lankverwagte Messias.  Die Een wat moes kom.

Die verhaal leer ons ‘n paar dinge oor die Koninkryk. Eerstens dat Jesus, “Hy wat as koning van die Jode gebore is” (2:2), nie kom net vir die Jode nie.  Sy Koninkryk sluit almal in! Die sterrekykers kom uit die ooste (waarskynlik uit Babilonië).  Hulle is nie Jode nie, maar hulle kom om aan die Koning hulde te bewys.  Sy Koningskap strek tot aan die uithoeke van die wêreld.

Tweedens leer ons vir Herodes, ‘n aardse koning, hier ken en begin Matteus om vir Jesus, die Hemelse Koning wat aarde toe gekom het, te kontrasteer met aardse konings. Die sterrekykers kom soek die koning by die paleis, want dit is mos waar konings bly.  Maar Hy is nie daar nie, want Hy is nie soos aardse konings nie.  Hy is in ‘n nederige krip in Bethlehem gebore.

Vir hulle wat hulle eie eer soek, soos Herodes, is die koms van die Koning, nie noodwendig goeie nuus nie, maar eerder ‘n bedreiging. Die Koninkryk van die Hemel gaan oor selfopoffering.  Daarom dat Herodes so hard probeer en na sulke uiterstes gaan om vir Jesus uit te wis.

Derdens leer ons dat die koms van God se Koninkryk onkeerbaar is.  Selfs nie eers die woedende Herodes se massa kindermoord kon dit keer nie. Hy sal sy plan uitvoer! God stuur vir Maria en Josef en die Kindjie na Egipte om hulle te beskerm en daarna na Nasaret, net soos die profete gesê het.

Dank die Here dat ek en jy ook deel van sy Koninkryk kan wees, ook hier in die Bosveld, aan die uithoeke van die wêreld.  En dat Hy nie soos aardse konings en leiers is nie, maar dat Hy aan Wie al die eer toekom, ons nederige en sagmoedige Koning is.

40 Dae 2022 – Dag 2

Posted on

Die idee van Jesus wat God se Koninkryk kom vestig het is reeds van die eerste vers van die Nuwe Testament af sigbaar. Matteus 1:1 sê:

“Die geslagsregister van Jesus Christus, die Seun van Dawid, die seun van Abraham”

Matteus beklemtoon die feit dat Jesus uit die nageslag van Abraham kom en dat Hy ‘n afstammeling van koning Dawid is (sien Matt 1:6) en kom wys daarmee reeds van die begin af dat ons hier met die beloofde Koning wat moes kom te doen het.  Saam met die belofte in Daniël 2 wat ons gister gelees het, is daar natuurlik die belofte dat die Messias (die Gesalfde van God) uit die huis van Dawid sou kom.

Dit kom uit God se belofte aan Dawid in 2 Samuel 7:12-13 wat sê:

“Wanneer jy te sterwe kom en jy by jou voorvaders rus, sal Ek een van jou nageslag, jou eie seun, koning maak en aan hom ‘n bestendige koningskap gee. Hy sal vir my Naam ‘n huis bou, en Ek sal sy koningskap vir altyd laat voortbestaan.”

As ons nog bietjie verder terugblaai dan kry ons ook in Genesis 22:18 die belofte (waaraan Matteus se Joodse lesers vasgehou het) wat sê dat al die nasies van die aarde  in Abraham se nageslag geseën sal wees.

Jy sien hoe belangrik dit is dat Matteus vir Jesus hier die Seun van Dawid en die seun van Abraham noem!  Met sorgvuldige moeite bewys hy hierdie feite dan in die opvolgende verse met Jesus se geslagsregister.  Wat vir ons maklik soos ‘n onsinnige lang lys van name kan lyk, of soos net ‘n onnodige lang inleiding kan klink, wat ons maklik oorslaan om by die meer interessante deel van die verhaal uit te kom, is eintlik alreeds besig om vir ons so baie te sê oor Wie Jesus is.

Dit is ook sommer hier aan die begin al vir ons ‘n groot leidraad in ons soeke na hoe die Koninkryk werk en watter kant bo moet wees – dit wys vir ons sonder twyfel Wie die Koning is en nooi ons dadelik in om meer uit te vind oor Hom en wat dit beteken om in SY Koninkryk te lewe.

Dit openbaar ook aan ons iets oor die getrouheid en die grootheid van God.  Dat sy eeue oue beloftes waar word.  Dat niks sy Plan in die wiele ry nie (selfs nie eers die sondes van die mense in Jesus se geslagsregister nie).  Dat Hy die Een is wat in beheer.  Soos wat ons in die dae wat kom alhoemeer gaan ontdek: Jesus is Koning!  In Hom breek die Koninkryk van God aan, en Hy nooi ons om burgers en medebouers daarvan te wees.

40 Dae 2022 – Dag 1

Posted on

In ‘n deurmekaar wêreld waar alles oor die algemeen voel of niemand meer weet watter kant bo is nie, wil ons in hierdie 40 dae saam soek na antwoorde en weer die wêreld regtekant bo draai.  Natuurlik gaan dit nie net oor die wye wêreld nie, maar ook oor elkeen van ons.  Dalk voel dit vir jou of jou eie persoonlike lewe op die oomblik die deurmekaar wêreld met al sy probleme soos ‘n lekker rustige piekniek laat lyk.

Om te kan weet watter kant nou eintlik die een is wat moet bo wees, moet ‘n mens natuurlik die saak van die regte kant af beskou.  Dit gaan oor perspektief!  Matteus help ons met hierdie perspektief.  Hy vertel vir ons hoe die Here Jesus die Koninkryk van die Hemel kom aankondig het en dáárin lê die geheim.  Jesus het die wêreld só totaal en al verander dat ons nuwe perspektief nodig het om te kan weet watter kant werklik bo is. As ons dan in die volgende 40 dae dieper delf in Matteus gaan ons vinnig agterkom hoe baie daardie perspektief afhang van ons verstaan van die Koninkryk van die Hemel.

Daarom vandag, op dag 1 van 40, dat ons so bietjie agtergrond nodig het oor Matteus se evangelie van die Koninkryk.  Die frase “Die Koninkryk van die Hemel” is uniek aan Matteus terwyl die ander evangelies eerder verwys na die “Koninkryk van God”.  Laasgenoemde kom natuurlik ook voor in Matteus en daar is baie parallelle verse tussen die evangelies wat vir ons bewys dat dit oor dieselfde Koninkryk gaan.

Maar wat sou die rede wees waarom Jesus in Matteus aangehaal word dat Hy meestal praat van die Koninkryk van die Hemel? By nadere studie sien ons dat Matteus meer na die hemel verwys as al die ander evangelies saam. Om die waarheid te sê verbind Matteus ook die “hemel” aan die “Vader” op meer as 20 geleenthede, terwyl slegs Markus ook hierdie konneksie maak, en dit net 2 keer.

Verder verwys Matteus ook meer as enige ander Nuwe Testamentiese boek na die “Koninkryk”. Behalwe vir die ander 3 evangelies praat Matteus meer oor die Koninkryk as al die ander Nuwe Testamentiese boeke saam!  Dit is duidelik dat hierdie twee konsepte van hemel en koninkryk vir Matteus onafskeidbaar belangrik was.

Jesus se Koningskap teenoor die aardse konings word deur Matteus beklemtoon.  So ook die Koninkryk van die hemel teenoor die aardse koninkryke.  Matteus wou hê dat sy lesers (en ons!) moet weet dat God se koninkryk het gekom en dat dit die aardse koninkryke kom vervang het.

Matteus wil hê dat mense moet sien dat die belofte van Daniël 2-7 waar geword het in Jesus. In Daniël 2:44 lees ons:

“In die tyd van daardie konings sal die God van die hemel ‘n koninkryk oprig wat nooit vernietig sal word nie. Hierdie koninkryk sal nie deur ‘n ander vervang word nie. Dit sal die ander koninkryk plat trap en vernietig, maar self sal dit vir altyd bestaan.”

Soos die gelowiges in Daniël se tyd en in Matteus se tyd sien ons hoedat die aardse konings en koninkryke teen God en sy koninkryk probeer in opstand kom (vgl. Psalm 2).  Maar ons ken die ware Koning en Hy maak ons deel van sy Koninkryk. Dis wanneer ons dit verstaan dat ons in ons soeke na sy Koninkryk gaan ontdek watter kant van ons wêreld eintlik bo moet wees en hoe dit ons prioriteite, ons besluite, ons lewens, ons perspektief verander.

Wat as ons sy opdrag (en belofte!) in Matteus 6:33 regtig begin ernstig opneem en dit doen…?

“Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee.”

Mag die Here ons help om te ontdek wat dit beteken om sy Koninkryk elke dag, aktief te soek.