Week van Gebed 2023 – Dag 5

Posted on

Ons maak vandag klaar met die laaste deel van Psalm 119.  Lees vanaf vers 141 tot 176.  Vra die Here om vandag met jou deur sy Woord te praat en om jou deur sy Gees te wys watter Waarheid Hy graag vandag vir jou wil duidelik maak.  Wanneer iets uit die teks dan by jou vassteek, praat met die Here daaroor en vra Hom om vir jou te wys hoe om dit in jou lewe uit te leef.

Die frase aan die begin van vers 149 steek vandag by my vas:

Handel volgens u liefde, Here, luister tog na my.
Laat u bepalings geld, hou my in die lewe.

“Handel volgens u liefde…”  Dit is wonderlik dat ons ook dit vir die Here kan vra.  As God nie volgens sy liefde opgetree het nie, sou ons almal lankal vergaan het.  Dit is die storie van God met die mens.  Dat God oor en oor vanuit sy liefde met ons handel.  Psalm 103:8-13 som dit so mooi op:

Barmhartig en genadig is die Here,
lankmoedig en vol liefde.
Hy sal ons ons sonde nie bly toereken
en nie vir ewig toornig bly nie.
Hy handel met ons nie volgens ons sondes nie,
vergeld ons nie vir ons ongeregtighede nie,
want so groot as die afstand tussen hemel en aarde is,
so groot is sy liefde vir dié wat Hom dien.
So ver as die ooste van die weste af is,
so ver verwyder Hy ons oortredinge van ons af.
Soos ‘n vader hom ontferm oor sy kinders,
so ontferm die Here Hom oor dié wat Hom dien.

God IS Liefde! (Sien 1 Joh 4:7-10) Hy tree op vanuit sy aard, vanuit sy liefde.  Hy skep, herskep, red, verlos, stuur, seën, alles vanuit sy liefde.  Daarom kan niks maar niks maar niks ons van sy liefde skei nie! (Rom 8:37-39)  Aan sy liefde is daar geen einde nie!

GEBED:

Ons bid vandag vir ons dorp.  Vir elke mens, jonk en oud wat hier in Ellisras woon en werk.  Ons bid vir elke besigheid groot en klein dat die Here dit sal seën.  Vir elke ouer wat lang ure insit om vir hulle kinders te kan sorg.  Ons bid vir gesinne – dat die Here ons gesinne sal sterk maak. Verhoudings sal heel maak, sterk maak en laat groei.   Ons bid vir Herlewing in ons dorp.  Dat die mense van Ellisras God se Wil sal soek en sal liefhê en alles wat ons aanpak vir sy Eer en Glorie wil doen.  Dat die liefde wat die Psalmdigter vir die Woord van God gehad het ook waar kan word van elkeen in ons dorp.

Week van Gebed 2023 – Dag 4

Posted on

Psalm 119:105-140 kom vandag aan die beurt.  Soos wat ons die res van die week gemaak het, wil ek jou ook vandag uitnooi om die teks luisterend en soekend te lees.  Lees die teks van die begin af met die doel in gedagte om te luister na wat dit is wat vir jou persoonlik op hierdie dag uitstaan.  Dit kan baie keer ‘n vers wees wat jy al ‘n 1000 keer in jou lewe gelees het, wat jou vandag net op ‘n nuwe manier tref en jou tussen die oë slaan.  Praat met die Here oor hierdie gedagtes en vra Hom om ook vir jou te wys hoe Hy wil hê jy daarop moet reageer tot sy Eer.

Vandag se gedeelte begin met die bekende woorde van vers 105: “U woord is die lamp wat my die weg wys, die lig op my pad.”  ‘n Inspirerende vers wat ons graag aanhaal.  Maar weereens moet ons nie die donker kant van die vers (en die Psalm) miskyk nie.  As mens na die trant van die Psalm luister kom ons agter dat die digter se lewe bedreig word, dat sy vyande op hom toesak, dat hy vals beskuldig word, ens.  Dit is juis binne in die duisternis dat hy beleef dat God se Woord vir hom die lig bring!

Dit val my vandag weer op dat die gedeelte gelaai is met ‘n klomp negatiewe dinge wat die digter beleef. Hy sê “ek ly swaar”, “my lewe is gedurig in gevaar”, “die goddeloses stel vir my ‘n strik”, ensovoorts.  Kyk of jy hulle almal kan identifiseer.

Maar by elkeen van hierdie negatiewe belewenisse is daar ‘n “maar”. Hy sê o.a. “maar u wet verontagsaam ek nie”, “maar van u bevele wyk ek nie af nie.”

Dit het my laat wonder oor ons eie verhoudings met die Here en oor hoe ons dink oor sy Woord…  Wat ons met die Bybel maak… Met die manier hoe God gekies het om Homself aan ons te openbaar…?  Is dit net ‘n “afterthought” in ons dag? Is dit iets wat ons net bestudeer met ‘n vergrootglas?  Is dit iets wat ons net lees om ons gewetens te sus of uit gewoonte of skuldgevoel?  Of is dit ons anker waaraan ons vashou, waardeur ons ons Vader se hart wil leer ken?  Smag ons daarna met ons hele wese, verlang ons daarna? (v. 131)

GEBED:

Ons dra vandag ons gemeente aan die Here op.  Ons bid dat die Here ons as gemeente sal lei om sy Wil te doen.  Dat Hy vir ons sal wys waar en hoe ons die grootste verskil kan maak hier in ons dorp waar Hy ons geroep het om sy Koninkryk te soek en te bou.  Mag die Here ons gewortel hou in sy Woord.  Mag Hy ons in liefde nader aan Hom en nader aan mekaar laat groei.  Mag Hy ons stuur en deur sy Gees in ons werk sodat sy vrugte sigbaar sal word oral waar ons beweeg.  Mag Hy ons help om skaduwee te gee vir mekaar en vir elkeen wat sy rus nodig het.  Mag Hy die eer en verheerliking ontvang in alles wat ons aanpak en alles wat ons sê en doen.  Mag Hy ons ook daagliks herinner dat ons sy Kerk IS en ons help om ons plek vol te staan in sy Liggaam.

Week van Gebed 2023 – Dag 3

Posted on

Ons lees vandag weer verder in Psalm 119.  Lees vandag vers 73-104.  Ek hoop jy begin al so bietjie in die ritme inkom en lees met opgewondenheid om raak te sien wat dit is wat die Here vandag vir jou in die teks wil wys.  Weereens is dit altyd ‘n goeie idee om die teks in meer as een vertaling te lees.

Kyk uit vir wat vandag vir jou uitstaan.  ‘n Vers, ‘n enkele woord, of ‘n gedagte. Dalk is dit ‘n prentjie of ‘n emosie wat by jou opkom terwyl jy lees.  Ondersoek jou gedagtes en probeer identifiseer waarom juis hierdie spesifieke ding vandag vir jou uitgestaan het en praat met die Here daaroor.

Vandag het die beeld van God se troon wat vasstaan my weer opgeval.  Vers 89-91 sê:

U woord, Here, staan vir altyd vas in die hemel.
U trou is van geslag tot geslag;
U het die aarde gemaak, en dit staan vas.
Ja, wat U bepaal het, staan vandag nog vas,
alles is aan U onderworpe.

En dan word ek sommer koud as die gedagte by my opkom van hoe betekenisloos die lewe, my lewe, sou wees as hierdie woorde nie waar was nie. Genadiglik aanbid ons die Groot “Ek is”.  Die Een wat is en was en kom!  Die Lewende God wat doen wat Hy sê Hy doen en is Wie Hy sê Hy is.

Stephanie het Sondag in die preek verwys na die liedjie “My Pa is die Koning” en dit sit nou in my kop vas:

My Pa is die Koning van die Heelal jy weetEn kom wat wil ek sal dit nooit vergeet nieDie wind kan waai die berge kan valHy’t gesê Hy voorsien en Hy sal

Die Woord van God staan vas!  Sy troon staan vas!  Hy regeer!

GEBED:

Ons bid vandag vir die vervolgde kerk wêreldwyd.  Elke dag is daar miljoene mense wat hulle lewens moet waag ter wille van die Evangelie.  Ons bid dat die Here hulle sal beskerm en vir hulle deure sal oopmaak om te kan getuig.  Ons big ook vir die vervolgers.  Dat die Here ook hulle harte sal verander en Homself aan hulle sal openbaar.  Ons bid ook vir ons eie land waar ons nog openlik kan getuig.  Maar waar die vervolging en verdrukking van gelowiges nog meer subtiel gebeur.  Mag die Here ook vir ons die dapperheid en die moed gee om oral waar ons kom te getuig, getuig, getuig. Tydig en ontydig.

(Gaan lees ook gerus die artikel oor die vervolgde kerk wat vandag in Maroela Media verskyn het: Al meer Christene wêreldwyd vervolg | Maroela Media )

Week van Gebed 2023 – Dag 2

Posted on

Lees vandag Psalm 119:36-72.  Doen dieselfde oefening as gister.  Kyk na watter vers/woord/gedagte vir jou persoonlik vandag uitstaan en dink daaroor na.  As jy tyd het sal dit goed wees om die gedeelte in ‘n ander vertaling ook te lees.  Praat met die Here oor wat dit is wat vir jou uitstaan.

Wat vir my persoonlik uitgestaan het vandag is die woordjie “hoop”. Met alles wat in ons land aan die gang is kan ons maklik hoop verloor.  Ons kan maklik vaskyk teen ons omstandighede en die groter prentjie miskyk.  Die werklike werklikheid is God wat op sy troon sit en regeer.  Ons is in sy Hande en Hy is by ons – daarom het ons hoop.

Die Psalmdigter stel sy hoop op die voorskrifte van die Here.  Op God se Woord, gebooie, verordeninge, bepalings stel hy sy vertroue. Dit voel vreemd om te sê dat ek “my hoop op God se wette” plaas.  Maar hier gaan dit oor baie meer as net die Wet! Dit gaan hier oor die bekendmaking van God se wil. Vir die Psalmdigter word God deur sy Woord verpersoonlik. God is die enigste en volkome verlosser van die mens en daarom is gehoorsaamheid aan Hom die beginpunt van geloof.  Daarom dat hy sy hoop op God stel.

Ons sien hier met ander woorde ook ‘n anderkant van die muntstuk, en dit is gehoorsaamheid. In Afrikaans het ons die mooi uitdrukking van “om jou kant skoon te hou”.  Wat sê dit oor ons liefde vir God en ons vertroue in Hom en sy beloftes as ons nie volgens sy Woord wil lewe nie?  Laat ons eerder soos die Psalmdigter maak en in volle oorgawe aan God lewe, ons totaal en al verlaat op Hom!  Sodat ons ook kan uitroep “Om u bevele uit te voer, is vir my die lewe.” (Ps 119:56)

GEBED

Kom ons bid vandag saam vir ons skole.  Daar is soveel aanslae op ons kinders en baie druk op ons skole.  Kom ons dra ons kinders en onderwysers aan die Here op.  Dat die Here hulle sal beskerm.  Dat Hy hulle fisies, geestelik en emosioneel sal veilig hou en sal dra. Sodat maksimale onderrig en groei kan plaasvind.

Week van Gebed 2023 – Dag 1

Posted on

Dit is weer die tyd van die jaar dat ons saam met die groter kerk in die land, en die wêreld, spesiaal ekstra tyd saam in gebed spandeer.  Ek wil jou uitnooi om hierdie week elke dag ‘n paar oomblikke saam met ons in te fokus op hierdie gedagtes en saam te bid oor spesifieke sake.

Psalm 119 se 176 verse word selde in geheel gelees.  Ons is partykeer bietjie bang vir die langste Psalm want hy is bietjie te veel om op een slag te hanteer.  Dan fokus ons eerder op die mooi, bekende enkele verse.  Maar kom ons gebruik hierdie week om weer diep in hierdie pragtige Psalm te gaan swem.

Dit vat ongeveer 17 minute om die hele Psalm deur te lees. So as ons oor die volgende vyf dae, elke dag ‘n gedeelte lees dan gaan dit slegs 3 en ‘n half minute per dag vat.  So dit is wat ons hierdie week gaan doen, nadink oor wat ons lees en saam bid.

Lees vandag Ps 119:1-35.  Dit is amper onmoontlik om een ding uit te sonder, want hier is so ‘n rykdom van wonderlike waarhede versamel.  Maar kyk gerus watter vers(e) staan vir jou uit?  Of dalk is dit net een woord wat vir jou uit spring.  Wat val jou op?  Dink na oor wat daardie spesifieke vers/woord/gedagte vir jou beteken en waarom dink jy staan daardie spesifieke ding nou juis vandag vir jou uit.  Praat met die Here daaroor.

Hoe stem dit wat jy vandag in die psalm lees ooreen met jou eie belewenis van jou verhouding met die Here op die oomblik?  Of dalk verskil dit?  Hoe vergelyk dit met hoe die wêreld rondom ons vandag lyk?

Hoe sou ons lewens (en daarom ons wêreld) lyk as die woorde van vers 14 vir ons nie net ‘n idee was nie, maar 100% regtig is hoe ons elke dag lewe?

“Om volgens u verordeninge te lewe,
gee my meer vreugde as al die rykdom van die wêreld.”

GEBED:

Kom ons bid vandag vir ons land.  En vra vir die Here dat Hy sal ingryp in al die wetteloosheid en korrupsie wat ons land en ons mense en ons kragnetwerk bedreig.  Maar kom ons vra ook die Here om ons ook te stuur en te wys waar ons ‘n verskil kan maak.  Laat Hy in ons, sy kinders, ‘n onuitblusbare liefde vir sy Woord laat opvlam sodat ons ook daar waar ons elke dag beweeg sy Lig kan skyn.