Ek hoop jy is saam met my opgewonde om verder in Markus te delf! Ons het nou al tot by hoofstuk 3 gevorder, en al so baie ontdek. Behalwe vir ons reis deur Markus, is daar ‘n paar ander belangrike datums hierdie kwartaal wat jy solank moet oophou.
Ons skop die kwartaal af met ‘n bang met ‘n Lofprysingsdiens. Ons het aan die begin van die jaar vir mekaar gesê dat ons meer gereeld wil saam sing, so nou voeg ons die daad by die woord. Sondag 7 April,die oggend 8:30 vier ons weer lofprysingsfees en sing heerlik saam tot eer van die Here. Hoop om jou daar te sien.
In Mei gaan ons weer lekker Pinksterreeks hou. Dit begin eintlik al met Hemelvaart op Donderdag 9 Mei. Dan het ons Hemelvaartdiens die aand om 18:30. Vrydag 10 Mei is ons weer bymekaar vir ‘n heerlike fliekaand. Ons kyk RISEN – hou die pers dop vir die voorprent!
Sondag 12 Mei skop ons Pinksterreeks boodskappe dan amptelik af. Sondag oggend EN aand, en Maandag, Dinsdag en Woensdag, elke aand. Ons sluit dan af met Pinksterfees op Sondag 19 Mei. Hierdie 10 dae van Hemelvaart tot en met Pinksterfees beloof om regtig verrykend te wees – kom beleef dit saam met ons!
En dan… die 31ste Mei en die 1ste Junie… is dit B’s Fees tyd!! Dan gaan ons weer lekker hard werk tot ons vingers en bene krom is en ons blase blase kry. Maar dit is die moeite werd, nie net vir al die pret wat daarmee saamgaan nie, maar vir die groot geleentheid wat dit is vir ons as gemeente om ‘n impak op ons gemeenskap te kan maak. Mag elke feesganger in elke ontmoeting en interaksie, in wat hulle sien, hoor of proe, die liefde van die Here by ons beleef!
Kom WEES saam met ons Weskerk.
