Gedagte vir die dag – Sien

Ons kan tog nie anders nie as om die Here te loof vir die voorreg om te kan sien. Die manier hoe die menslike oog ontwerp het is mindblowing!

In die Bybel word daar eintlik nogal baie van hierdie sintuig gepraat. Daar is eintlik te veel voorbeelde om op te noem, maar kom ons kyk net na ‘n paar. Daar is, eerstens, dit wat ons sien:

“As ek u hemel aanskou, die werk van u vingers, die maan en die sterre waaraan U ‘n plek gegee het, wat is die mens dan dat U aan hom dink, die mensekind dat U na hom omsien?” (Ps 8:4-5)

Die Bybel vertel ook vir ons wat God sien:

“Here, U sien dwarsdeur my, U ken my.” (Ps 139:1) en “Wie in die hemel of op die aarde is soos die Here ons God, wat hoog woon en hier onder alles sien?” (Ps 113:5-6)

Dan sê dit ook natuurlik iets van wat ons nie sien nie:

“Om te glo, is om seker te wees van die dinge wat ons hoop, om oortuig te wees van die dinge wat ons nie sien nie.” (Heb 11:1)

En wat ons graag wil sien sodat ons kan glo as ons in Johannes 20:25 lees van Tomas:

“Die ander dissipels sê toe vir hom: “Ons het die Here gesien!” Maar hy sê vir hulle: “As ek nie die merke van die spykers in sy hande sien en my vinger in die merke van die spykers steek en my hand in sy sy steek nie, sal ek nooit glo nie.” ”

Dan gebeur die wonderwerk in die volgende verse:

“Ag dae later was Jesus se dissipels weer bymekaar, en Tomas was by hulle. Hoewel die deure gesluit was, het Jesus gekom en tussen hulle gaan staan en gesê: “Vrede vir julle!” Daarna sê Hy vir Tomas: “Bring jou vinger hier en kyk na my hande; en bring jou hand en steek hom in my sy; en moenie langer ongelowig wees nie, maar wees gelowig.” En Tomas sê vir Hom: “My Here en my God!” Toe sê Jesus vir hom: “Glo jy nou omdat jy My sien? Gelukkig is dié wat nie gesien het nie en tog glo.” ”

Ons is soms geneig om neer te kyk op die arme “ongelowige Tomas” oor sy kortsigtigheid. Maar soos Tomas het ons almal tog die behoefte dat ons graag wil sien en glo. Maar die wonderlike is dat die Here aan die dissipels verskyn het sodat ons kan glo en sien! Ons lees in Johannes 20 vers 30 en 31:

“Jesus het nog baie ander wondertekens, wat nie in hierdie boek beskrywe is nie, voor sy dissipels gedoen. Maar hierdie wondertekens is beskrywe sodat julle kan glo dat Jesus die Christus is, die Seun van God, en sodat julle deur te glo, in sy Naam die lewe kan hê.”

Omdat ons glo kan ons anders na die wêreld kyk, verander ons perspektief, sien ons dinge raak wat ons andersins sou misgekyk het, sien ons die werk van sy vingers soos Psalm 8 sê. Maar kan ons weereens ook, soos ons die res van die week ook ontdek het, deur ons lewens, deur ons liefde, God sigbaar maak vir ‘n wêreld wat Hom nog nie gesien het nie en Hom so, so nodig het.