Dit is interessant hoedat ons gesprek oor Jona en dit wat ons by Jona sien en beleef op soveel ander plekke in die Bybel weer en weer opkom. So is daar byvoorbeeld Psalm 116 waar ons baie dieselfde taalgebruik en atmosfeer aantref as dit wat ons in Jona kry. Hoor hoe klink vers 1-6 van die Psalm:
Ek het die Here lief,
want Hy verhoor my smeekgebede.
Hy het na my geluister toe ek Hom aangeroep het.
Bande van die dood het my omsluit,
doodsangs het my aangegryp,
ek het benoud en bekommerd geword.
Toe het ek die Naam van die Here aangeroep:
“Here, red my tog!”
Die Here is genadig en regverdig,
ons God ontferm Hom oor ons.
Die Here beskerm die hulpeloses:
ek was magteloos, maar Hy het my gered.
Dit bevestig o.a. net vandag weer dat jy (en Jona!) nie alleen is in jou belewenis nie en ook nie alleen is daar waar jy is nie. Dit bevestig dat die Here is Wie Hy sê Hy is en Hy doen wat Hy sê Hy doen! Die Here is by jou.
As jy angstig is, benoud, of bekommerd is. As jy hulpeloos of magteloos voel, die Here verhoor jou smeekgebede. Hy luister, Hy ontferm, Hy beskerm, Hy red.
